Chiovi nu paisi desertu (I suspira da me terra)

Chiovi finu finu e a lavina sta ncuminciannu a calari di li utteri, fu lu ventu forti di stamatina a purtari li negni d'acqua, mentri lu friddu s'infila nta l'ossa. U fruttivendulu vannia a Funtanedda e si ripara di l'acqua sutta u cappucciu du giachittuni, ca ora sta nfurzannu, nu ntrasi dintra u cammiu picchi incurraggia a genti a cattarisi a frutta. Ma la genti nu nveni nta u vanniaturi, picchi ora l'acqua sgrizzia a tutti banni e a tempesta nu nviri a nuddu, curri a sciumana mezzu i strati, ringhi li fossa e rumpi i canali. Nu viri li paracca di la genti ca currinu dintra a ntanarisi, ne l'arbuli ca frischianu sutta u ventu e i pampini parinu ca toccanu nterra, nu viri i grasti ne balcuna allavangati, ne i atti murghi ca si gnunianu sutta i machini. U fracassu di l'acqua si fa sentiri forti, ora sulu idda ioca mezzu i strati allavangati, mezzu i curtigghia e vaneddi du paisi desertu c'ora dormi nsonnu ngninu, picchi scurà chiuvennu fora e dintra u cori di la genti chi gghi a dormiri.