Li diavuli di la Zisa

Li diavoli di la Zisa stanotti scapparu a lu scuru firriaru lu Cassaru e jeru a pusari a la Magiuni. C’era lu scuru e tanta genti aspettava curiusa e muta cu l’occhi di fora, nun sapennu comu passari la notti sittimbrina. Ci pinsaru li diavoli a fari festa dda notti si misiru supra li stanghi e lu focu addumaru pi vinciri lu scuru. Matri mea chi sceni tutti li mostri di l’infanzia vinniru subitu fora! Accumpagnati di li frisci di li botti di li mascuna jochi di focu, sunati chi nun si ponnu scurdari; chi notti d’incantu chi nun pozzu cchiù scurdari, cu avi la fantasia la usa, la spremi e s’immagina di essiri ancora’ncapu ‘na nevula chi viaggia, chi canta chissa poi chi cosa. Cu mia c’è Tiresa chi ridi contenta s’avvicina, mi tocca pi dirimi allegra: “Che bedda sta sira”! poi si metti la maschira e cumencia a parlari d’arti di vecchi mura di città e la genti l’attenta certi voti smaniusa di acchiappari li diavoli, Giacumina mi camina vicina mi pari sta picciotta ‘nti lu cori veru bedda l’occhiu vivaci, diritta la nasca asciutta di vita comu ‘na cannila, nun circatici li minni; hannu lu pettu chiattu li fimmini d’oggi!