Promesse locali

Par strada vardavo i manifesti elettorali, le stesse facce che se vede sui giornali ma nel quartier gente in classe col tale o el quale, gente anca massa normale o anormale in senso bruto. I se gode a promettar promesse de rimando, i ghe va a drio al comando tirando in torta un po' tutti. I parla coi rutti parché tanto piassè noi sa far, i se impegna a risolvar le robe e dopo te vedi nassar piassse nove 'ndo sa le ghera e al posto del giardin piantumato un bel supermercato co' insima quatro piani che querse tutto. Adesso capiso parchè i parla co' un rutto: parché se i disesse le robe come le sta, ci se speta de vedar mantegnua la promessa, se sentirea ciavà savendo che a n'altro la ghe sta fatta contraria o istessa. Se capisse ben la gente bona da che parte la sta, poareti magari jè anca in bona fede, almanco finché no se vede sa i g'ha guadagnà. A olte penso a quei che laora e no dorme la note, a quei che fa a bote par un toco de pan, parché no, anca ai barboni che varda le stele davanti ai Barana. Vedo piassè strana la gente che vende piaseri, sugando coi sogni e i pensieri dei altri; no gh'è cavalieri o asessori che risolve tutto gh'è quel che gh'è e quel che manca e quel che ormai stanca son le promesse.