Le acque miracolose

Forse sarea mejo anca ancò nar a far un giro so a l’Adese, nar vanti fin do se pol, caminando in meso ale piope e i salgari, contemplar i robini, nasar l’odor del vecio spocacion, poro Adese, gnanca el se inquinesse da solo. Si l’è mejo narghe anca ancò, ansi no, l’è Sabo, l’è piassè belo el Luni o el Marti o la matina bonora, quando fora ghe poca gente. Ma l’è nel sconforto che sento sto bisogno, de butarme in tera ndo no ghe gente che vede, na’ in serca dele piere tonde e farle saltar ndo l’acqua l’è ferma, i pensieri i se trasforma, e quando me ghe spejo vedo naltra persona, quela vera, quela bona, che no abandonarea el gato, figurarse n’idea giusta, na fameja, la rason. Sto magòn el sparisse solo nel riflesso, dele acque ciare che tanto ben conosso, finché na sveja la me urta nel fosso drio le risare, la me dise che l’è ora de tornar, e sbajo casa e no gho più le ciave.