Dialettali 3 ottobre 2013 · lettura 2 min · 8431 letture

+ Segui

Ie campo pe’ magnà e me cumanna ‘a panza... Parlanno cu crianza ie l’aggia ‘mbuttunà. Guardate comme è bella! Sentite comme è chiena! Manco zi’ Bacco ‘a tene: chesta è sua maestà... Cca dinto ce sta ‘o sfunno ‘o mmeglio ‘e tutta ‘a vita ca è doce e sapurita: chesta è na pappamunno! E si pe’ caso è moscia... allora... sei briosce... quatt’ove mez’anguilla e me retorna arilla. Po’ doppo p’ ‘a carmà justo p’ ‘a fa’ cuntenta faccio rifornimento: fasule e pane cuotto spaghetti na ‘nzalata ‘a carne ‘mpasticciata. E ‘o vino? Nun le manca sulo ca po’ se stanca e cu nu fritto ‘e pesce ‘a faccio arrepusà. Voi dite: “Chella cresce e troppo afora aesce...” E certo... genta bella chesta è na putechella! Perciò ca ogne juorno (e nun me metto scuorno) ce ‘nforno ‘o bbene ‘e Dio spuntanno ogne vulio. E ‘a notte verso ‘e tre (è l’ora cchiù propizia) p’avè nu poco ‘e sfizio propio p’ ‘a mantenè ce ‘nforna na frittata e doppo a sta pariata senza se trattenè s’addorme pinto e rrè. E quanno po’ è Natale essa è nu generale: te mette sull’attenti tutte ‘e pietanzità e a una a una ‘e chiamma pronte pe fa’ marcià. Sulo ca ogne tanto ‘o core è tradetore e cu sta votta santa nun sape fa’ cchiù ammore e sbatte e te fa’ ‘o pazzo se sfianca e se strapazza mente ca a volo a volo saglie ‘o colesterolo. E allora?... O me cupiate e assieme a me schiattate... oppure, pe’ pietà: magnate pe’ campa‘!

♥ 0 💬 2

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese