Dialettali 3 febbraio 2015 · lettura 4 min · 661 letture

S + Segui

C’era na vota supra na chiazza na balatedda, ca comu na pazza mentri u paisi s’addummiscìa contru la sorti cchiù forti chiancìa: «Sulu pi fissa m’hana pigghiatu» jeva dicennu cô cori pisanti «intra sta chiazza, cu m’ha purtatu? Nun vogghiu moriri di corpa e scanti». C’era na statua ca ‘n costu a idda ‘scutava i lacrimi dâ picciridda, e comu fanu li curtigghiari pigghiau curaggiu pi poi ‘ddumannari: «Nicuzza duci, chi ti lamenti? C’è nu paisi ca dormi alluppiatu: luci, cannili, lampiuni su’ spenti e cu sti schigghi sta sfardannu ciatu!». A balatedda, stannu assittata dissi: «Che bedda, sta scorcia ‘mpanata! Chiddu ca passu, tu nun capisci su vòi tô cuntu, su nun t’addurmisci. Ju sugnu nata nda n’ pararisu chinu d’amuri, addubbatu di gioia: nun c’era jornu supra u mo visu chinu di sulu n’anticchia di noia o di duluri, o di tristizza, passava u tempu ciaurannu billizza». «Bih mischinedda, picchì ‘n mi dici tutta sta vita poi chi fini fici?». «Dopu lu granu arriva a canigghia» a balatedda arrispusi, affunciata «Cu mi strappau dâ ma famigghia nun havi ancora a cuasetta vagnata: corpa e lignati, nun ci su stori, battunu forti ccà supra lu cori. C’è nu cristanu, megghiu, n’armali ca cô mazzolu mi fa sulu mali: supra a ma peddi janca di nivi mi suca u spirtu, l’arma si vivi, joca pigghiannumi a tumbulati, l’uci ca schigghiu ci l’havi sarbati». Cô sangui acqua, a balatedda pareva fussi macari cchiù bedda, e l’autra amica, stannu a sintiri, s’asciucau i pinnula prima di diri: «Supra sta chiazza t’hana purtatu e i to lamenti mi squagghianu i vini. Ma tu nicuzza forsi hai scurdatu ca la racina si pesta ndê tini, ca lu cuttuni supra u tilaru veni strazzatu ccà e ddà, paru paru, ca n’anidduzzu prizziusu è cusutu sulu su l’oru è squagghiatu e battutu; l’arbolu n’ nasci su la simenza poi nun si spacca, murennu ndâ terra, nè li pinseri jauti dâ scienza hana nasciutu ndâ paci, ma ‘n guerra. Tu picciridda, nata prizziusa comu na dea, na ninfa, na musa, lu to talentu, unni tô urri? Marmuru jancu ddà dintra ti scurri! Pensa ê cristiani: tutti mischini su nun ci fussi u sapuri dô vinu, senza cuttuni pi fari vistini, senza cchiù aneddi, o ummiri ‘i pinu. Lassa ca chiddu duni lignati nun sunu corpa, ma su’ scappiddati, e lu mazzolu, di chiantu chinu ti fa cchiù lustra, e ‘ccumpagna ô bulinu: ora nun viri, l’ugna ti manci e pensi ch’iddu pi fissa ti pigghia ma li dulura pi cui tu chianci n’ jornu sarannu la to maravigghia». A ddi paroli, la balatedda pareva fussi ancora cchiù bedda e dô lamentu, muta si fici comu n’ cristianu ch’esulta e nun dici. «Nicuzza bedda, nun piularti a suffirenza nun è mai schifìu: da balatedda a opira d’arti iddu t’ha bàttiri, ed è u to vattìu».

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Salvo Ruscica