Mamma

Como t'agatto, mamma, e ses dormida in cussu giassu longu e fioridu a ue un'ater'una t'at sighidu, da un'istajone 'e prantu, mai godida. Cun pagas rimas canto, o mamma mia, e s'ammentu rennovat sa puntura, como ch'est oscurada onzi lugura, e m'accumpagnat sa malinconia. Maju bestit sas vestes coloridas, profumat d'ervas anti 'e sa calura, ridente, mamma 'e tottus, sa natura sanat sas oras puru addoloridas. Est festa 'e coro in tottu sa campura, sos ortos prosperosos dant cuntentu a s'ortulanu, maju est in fermentu, luego battit fruttora e birdura. Ma custa est s'ora puru 'e dedicare su pensamentu a chie m'at partoridu, e a cussa chi sa sorte m'at battidu, imbenujadu e tristu, a l'ammentare.