Como abbellu

Como abbellu, e lassademi iscurtare sos toccos chi m'arrivint dae tesu, in custu chelu limpiu, sempre avvesu a bolos de chie est solitu cantare. Est unu ninna ninna e nat “ispera!” in su merie silente e solianu. Prit'est chi no appo intesu dae manzanu sa manu carignosa de s'aera? Forsi no est troppu tardu, no est invanu, cunfesso chi nd'aiat bisonzu abberu pro bajulare tempus prus severu chi at olvidadu sos risos d’ 'eranu. Como abbellu, lassademi iscurtare, pensamentos d'anneu, sol'un'istante, su murmuttu ch'arrivit dae levante cun benennidos bentos dae su mare. E deo serro sos ojos pro imbentare bolos in chelos giaros un'iscutta, fuende a largos giros dae sa rutta, antiga passione de rimare. Fuo che puzone in mesu a su cantare chi pesat s'istajone allegramente e torro a cussu sinu, cun sa mente, ch'aia bisonzu 'e deper abbratzare.