Dialettali 20 luglio 2015 · lettura 2 min · 2655 letture

+ Segui

Ntesta o Carminu semplici eranu li casuzzi, ma chini di vita, li barcuneddra nichi e nfiuriati ca di javuru inchivanu puru li strati. Genti semplici ma di bon cori, ca ti dava l’arma e ti faciva scurdari li pinzeri. Inchivanu li vaneddri, di tanti figli beddri e unn s’arripusavanu mà mancu quannu ni lu celu spuntavanu li stiddri. Vaneddri stritti ma beddri puliziati ca si sintivanu di na porta all’antra puru li jati, dunni li figli jucavanu cuntenti e s’addivirtivanu puru cu nnenti. Ora ni sti tempi scillirati nun si po’ stari cchiù nmezzu li strati. Palazzi ranni e genti murtizza, li strati su chini di munnizza, li picciliddri un sannu cchiù jucari e passanu lu tempu a farisi ntussicari di ddri diavularii, di certi jochi, ca fannu sulu mali e lassanu lu ciriveddru senza sali. Chi fussi bellu nnarrè riturnari nzignari a li figli qual’ è lu veru campari, ripurtari e quarteri vecchi l’allegria di na vota unni a cumpagnia era sincera e divota, unn’abbannunari mancu na via facennu du passatu, ricchizza e puisia.

#Vita#Nostalgia#Altruismo#Ricordo#Unione

♥ 0 💬 2

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Melina Licata