Mi dimando

Da ue, mi dimando, ch'est 'ennìdu in custu logu amenu e bellu tantu, e prite custa sorte dat piantu misciadu a gosu a s’omine naschidu? Oh ma cantu est iscuru s’arrejonu chi si frimmat inoghe e no at ‘essida, innanti a su misteriu de sa vida, e de pius a s’ora ‘e s’abbandonu. Deo campo in d una terra populada dae milli castas d’arvures e feras chi s’ant partidu buscos e costeras dae cando cust’istoria est comintzada, e ormina, in chelu, de ateras anderas giughent a mundos in s’oscuridade. Cantu m’anneo pro sa difficultade de leggere sas intimas peleas chi sunt de totaganta umanidade in mesu 'e terremotos e mareas pro sos disignos de s’ eternidade. Oh ite pagu conto, e non cumando pro me matessi ne vida e ne morte, comintzo e ispero solu in bona sorte, ma prite esisto inoghe mi dimando. So alenu de un’amore ch’at unidu duas ateras pessones accisadas, so’ anima e carena de passadas, remotas, amorosas istajones, so fruttu de sentidos e rejones chi a inoghe sen’ischire mi ant ‘attidu. Eppuru so niente, so famidu però de intender palpitos ancora, m’ispanto a sos lugores de s’aurora, mi dolet s’ido un’omine patidu, e visiones raras m’ant muttidu ispissu a sa poesia de sa disora. Cando a s’ intrighinada si colora( t) s’aèra e pintat donzi monte attesu, a s’anima, surpresa, cedo, arresu, suspiros de s’incantu ch’ido infora.