Sta vita è na scala

A scola m’acchiana a prissioni quannu scinnunu i voti e a casa mi scinni a passioni quannu di l’autru latu ti voti. Nto trenu a la stazioni c’è u picciottu ca, cuntentu, acchiana e c’è lu vecchiu ca, stancu, scinni, c’è a carusa ca a vistina s’acchiana e c’è a signura ca l’età si scinni. Nta televisioni c’è u politicu ca, pi cchianari, fumu vinni mentri chiddu troppu onestu, mutu mutu, scinni. Dopu a morti c’è lu cristianu ca si n’acchiana in pararisu e, inveci, lu piccaturi si ni scinni all’infernu tisu tisu. Sta vita è tutta na scala, c’è cu acchiana e c’è cu si ni cala.