Trovala na parlata cchiù'mpurtanti

Falla sunari sempri sta nenia antica ca ti ‘nzignò la to terra quann’eri nica cantata fu ri li vecchi ca eranu cu tia quannu un sapivi a ricchizza ca tinia. . Ti nesci sula sula di la vucca la senti... rinasci senza vuliri radichi forti dill’aulivi teni comu st’albiru un voli muriri. Fa’ ca un ti po’ scappari cuntala cui cunti di na vota tenila forti d’intra lu pettu a li to figghi ‘nzignala prestu . Appizzati supra li linzola dill’”Orbu” siminati pi la strata ci trovi mill’anni da so storia ‘mpastata di fatichi e di suduri, di guerri, di battagli e di l’anuri di cantilena di populi conquistaturi. S’ammiscà sì, cu la terra straniera ni vinni fora accussì la nostra bannera ca di corredu priziusu è arricamata ogni stornellu ca ni vinni lassatu è teneru comu un figghiu appena parturitu. Trovala n’antra lingua cchiù ‘mpurtanti ca si unn’era pi lu Sommu Danti unurata e parlata era da tutti quanti ma u stissu resta refrigeriu di surgiva mai stagnanti E’ forti e sana, è sapurita, c’è spezi e c’è sali, c’è lacrimi e duluri e c’è la nostra vita .