Dialettali 20 maggio 2020 · lettura 1 min · 1421 letture

+ Segui

Son ‘nfucato e so’ scaruso e pe chesto so’ zuzzuso. Tengo l’uocchio fino fino ca te guarda e fa ‘o cerino e vulesse strascina’ tutt’a ‘a vita a sciabbulia’ e si tu le daje arricietto t’addevento nu sarvietto. Songo armuso e so’ appicciato e me ‘nfilo int’o pignato. Comme ‘a notte schiara ‘o juorno ie t’afferro senza scuorno e me faccio na ‘nzalata ‘mbraccio a te ca sì pupata c’a certezza ca dimane me ce vonno quatte mane. So’ malato e so’ lappuso e si veco nu purtuso busso sbatto e si s’arape ie me faccio tagliacape e le dongo ‘o fele e ‘o doce ‘e sta freva ca me coce e me fa senti’ fetente cu st’ammore mio ‘nnucente. So’ scialuso e so’ ‘nturzato e stu bbene perlibato t’o cunziglio bbella mia ca è ‘a cchiù fresca ciucciaria ‘nzista femmena e marfosa e te pogne comme a rosa e tu ‘o truove pronto all’uso pecché ‘o saje: ie so’ scaruso!

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese