Dialettali 5 giugno 2024 · lettura 2 min · 585 letture

+ Segui

Pe’ mastria’ ce vole assaje esperienza arte... mestiere... prufessionalità. E vote po’ basta’ na vocazione ma si nu tuozzo t’a fatto fa lezione e si bizzoca allora è meglio ancora. Po’ ce mettesse ‘o poco ‘e ‘nfamità na ponta ‘e raggia na faccia appucenuta tre o quatte cuccie na cana ca t’aiuta purtanne e ripurtanne ogne parola e comme a niente tu si ‘a primma scola. A tene’ ‘a boria ca smove sti muntagne ’o fele addà servi’ si no nun magne... T’a fa chiarchiosa serpe e ‘ntapecona e ogne pilo addà pare’ travone. E si p’ave’ ce vole na chiagnuta fatte funtana: conta ca l’haie avuto. ’A gente a spuzzulia’ cu l’accurtezza facennela capace ca è munnezza... Ma ‘a cosa cchiù chiantosa è chesta ccà: li a fa scanna’ tra loro a fa sfessa’ s’anna guarda’ cu ruzza e maje c’o core. Nun sia maje ca afferrano ‘o calore ’e chi si mette aunito a fraveca’: ’a tanno tu haie fernuto ‘e gallia’. Perciò arricuorde e tiene sempe a mente tutte sti cose e falle alleramente tanto c’ ‘a morte te resta ‘o riesto ‘e niente. Però si doppo schioppa n’ato munno tiene ‘a speranza ‘e guverna’ ‘o sprufunno.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese