Dialettali 6 novembre 2024 · lettura 2 min · 472 letture

+ Segui

‘A legge ca vuleva fa’ ‘a zitella se spusaie nu poco vecchierella cu nu certo Principio d’Uguaglianza nu scarfasegge senza pate e arte (comme sta scritto dinto a certi carte) ca spuzzuliava areto a nu bancone c’ ‘a smania ‘e pute’ fa’ ‘a rivoluzione... E quanno a essa le crescette ‘a panza le nascette na figlia strambalata cecata e cu na voglia a ogne mana (nu valanzone e na spatella strana)... E appena ‘o pate avette po’ ‘a nutizia ‘ncopp‘o comune t‘ ‘a chiammaie Giustizia. ‘A guagliona crescette assaie fissata cu dint’ ‘a capa sulo una cuvata... Studiava... addimmannava e se furmava cu tanta voglia e tale abilità ca s’appizzaie per la legalità... e il giorno che fu assunta in tribunale se presentaie scrivenno a nu giurnale: “Vi giuro ca chi vene int’a sti sale si sentirà trattato tale e quale... Fosse nu rrè oppure nu brigante annante a me nun ce starranno sante!” E ‘a storia soia davvero fu così e ogne juorno sapeva ‘e viernarì... Smiccianno ‘e carte leggeva dint’ ‘e core te taccariava ‘o malapavatore e ‘a legge t’applicava stantemente a cricche e a chiuove a tutte accortamente... e pure ‘o cchiù samente cundannato traseva dint’ ‘a cella cunfurtato... e pure ‘a cchiù ‘nguacchiata caccavella traseva fieto e asceva pempenella... Ma ‘o suonno resta suonno pe’ na notte e ‘a terra ca è ‘mpurpata ‘e asciuttavotte cagnaie culore e ‘a signurina nosta se truvaie a lutta’ cu ‘e zucagnoste ca spannettero perchie e scarrafune scusennele maronne a una a una tanto ca essa sentennese spugliata lassaie stu munno ancora cchiù schifata e mo’ nisciuno sape addò po’ sta... Se dice ca ogne tanto va p’ ‘e scole cercanno ‘e dà na mano a chelli sole ca ancora troppe prene ‘e smuccarie d’ ‘a vita nun te sanno puorte e vie e conta a tanti core peccerille che la giustizia un giorno trionferà. Quando e in che modo nisciuno ‘o po’ appura’!

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese