Dialettali 21 maggio 2025 · lettura 2 min · 425 letture

+ Segui

Caro Pino te scrivo pecché te chiamme Peppe comme a me e dint’ ‘o core tengo ‘a vocia toia e dint’a chiocca sbatte chella foia ca ‘nfoca e m’accumpagna sti notte ‘e schiattemiento ca sonano c’ ‘a luna ‘mbraccio ‘o viento. Caro Pino te scrivo pecché songo crisciuto ‘nzieme a te cu ‘e note ‘e sta chitarra smatrecata ca tanti cose nove m’ha ‘mparato mente tenevo ‘o sole dint’ ‘a sacca ‘ncopp’a stu munno fatto ‘e cosce corte dint’a sti vene nere cchiù d’ ‘a morte. Caro Pino te scrivo cu sta passione amara ca me piglia ‘ncoppa a sta carta mamma pate e figlia quanno na penna azzurra comm’ ‘o mare cerca int’ a ll’aria justo nu riparo e canta sona e abballa assieme a te mente sta vita vò sape’ ‘o pecché. Caro Pino te scrivo pe’ chesta terra chiena ‘e pucundria pe’ sta muntagna sora a l’alleria pe’ sta gente allancata quanno chiove pecché me piace ‘o blues ca porta addò saje tu... ie sto vicino a te... che voglio ‘e cchiù?

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese