Traseva maggio

Traseva maggio, era 'o quatto o.. ‘o cinche si nun me ricordo malo. Va trova comme fuje ca senza pena e lacrime doppo na vampata d’ammore Rusaria mia cagnaste idea! ‘E prete e senza scanzo, comme si niente fosse stato, senza n’appiceco, me diciste: -St’ammore nun po’ essere nuje ce avimmo spartere ognuno ‘a via soja, addà piglià! - Facetto comme vuliste tu: svacantato, senz’aizà ‘a capo sfreggiato d‘ ‘e parole toje, po’ munno sbattuto, all’intrasatta sprufunnaio d’int’a nu dulore doce e amaro. Pugnuto ogne juorno 'a aco suttile, strille ‘e morte pe’ anne po’ stu core mannajo! Quanta sete suppurtaje senza na goccia d’ammore sta povera anema mia! Senza cchiù rareca, sta vita fatta ‘e niente, sciore sicco addeventaje! Ammore te perdetto pe’ sempe! Mo ca niente spero, struppiato da ‘o tiempo e secutiato d’ ‘a morte, i’ chiù neanche m’ annasconno si a ncuntrà veco ca me vene! Credime, ammore perduto si s’appresentasso ‘e maggio e me carriasse appriess’a essa t’assicura, siccome doje vote nun se more, sta sicuro ca manco me n’accurgesso! .