'U primu 'i Maggiu

'U primu 'i maggiu, tutti a fistiggiari ca è la festa di travagghiaturi, si penza a divirtirisi e mangiari facènnu tutti li villiggiaturi. Tutta 'a campagna è china di genti circannu 'i posti bboni arriparati unni ccu l'amici e li parenti si po stari tranquilli e spinzirati. Li carusiddi jocunu o palluni, 'a zà Pippina pripara 'i mulinciani, li signurini si sèntunu 'i canzuni 'u zù Turiddu ca tagghia lu pani. Si fanu li cacocciùli arrustuti, li carduni spinusi 'nfarinati, quattru uviceddi e patati frijuti e ppi gradiri du'brocculi affucati; 'na pezza di tumazzu picurinu, quattru favuzzi 'nsemi ccu 'i puseddi, anticchia 'i trippa fatta a spizzatinu e 'na frittata ccu li cucuzzeddi, purpetti 'i pani ccu agghiu e putrisinu li nuci assemi a lu parmigianu, li pumadoru, cipudda e fasulinu li beddi angiovi chi ciaru ca fanu! Certu, chissu è sulu 'nu spuntinu va... tantu ppi priparari lu palatu poi si fa l'assaggiu di lu vinu ppi vìdiri si è bbonu o è malatu. A menzijornu 'ncumincia l'atru turnu, nuddu havi fami, nuddu voli nenti, sulu anticchia 'i pasta fatta o furnu e du' spaghetti all'ogghiu beddi ardenti. Si rusti 'a stigghiulata di l'agneddu, anticchia di sasizza di maiali, un pocu di custatu di viteddu, du pollu si ci rusti sulu l'ali. Li costi e li spadduzzi du castratu, du' quagghi senza pipi e pocu sali, lu cunigghieddu va fattu 'nfurnatu ccu lu tacchinu ruspanti naturali. 'A genti sunu anticchia spitittati, còddunu tutti a cannarozzu chinu, spàrtunu l'urtima teglia di patati e si svacanda 'u buttigghiuni 'i vinu; ppi digiriri, tri pezzi di turruni! Lu tiramisù, du' beddi porzioni! Li cassateddi e puru li sfingiuni, cannoli ccu 'a ricotta, chi su bboni! Ccu lucafè, arriva la dulcizza, ognunu biva la so bedda tazza, l'amaru resta sempri 'na cirtizza ppi cumplitari sta jurnata pazza. Ora ci manca sulu 'na durmuta sutta 'npedi d'alivu a la friscura pinzannu ca la prossima nisciuta: facèmu dieta e taliàmu 'a natura!