C'è

C'è a ccu la vita tocca di cchianata lustru nun si nni vidi e resta o scuru, casca e si susi, poi natra cascata e ci finisci a mangiari pani duru. C'è cu lu pani mancu lu talìa, di chiddu c'havi nun è mai cuntentu, ppi 'na cusuzza 'i nenti s'abbilìa e pari sempri 'a mamma du lamentu. C'è cu la notti soffri e s'affriddura sulu ccu 'na cuperta di cartuni, havi sulu lu ciatu ppi calura a lu riparu cerca la so gnuni. C'è cu lu lettu l'havi a baldacchinu ccu li linzola beddi prufumati, cu ci porta lu latti a lu matinu stanchi d'un fari nenti e 'nzunnacchiati C'è cu da sorti veni abbannunatu, poviru e pazzu perdi li cirveddi sta 'ndi stu munnu sulu e rifiutatu e aspetta sulu ca la vita speddi. C'è cu appena nasci è 'ncurunatu, camina sempri supra lu tappitu, vèni di tanta genti 'ncannistratu, porta n'aneddu d'oru ppi ogni jitu. . C'è sulu 'na cosa bbona 'ndi stu munnu ca servi a tanti ppi cunsulazioni, cu prima o dopu, puru 'nda 'nsecunnu, nun c'è ppi nuddu n'atra soluzioni; C'è ca nun si po trattari ccu 'a natura e nuddu 'a vita si la po accattari, quannu sona 'a campana e arriva l'ura nun basta avìri 'na borsa di dinari.