Du' littri sculuruti

Truvaju intra un casciolu sistimati, du' littri vecchi tutti sculuruti, scritti di mia carusu e poi sarvati ppi fatti e granni peni assai patuti. Versi di puisia didicati a 'na picciotta ccu 'i capiddi 'nfuti, bedda 'ndi li fattizzi comu 'i fati e l'occhi di stidduzzi risurvuti; sogni di giuvintù accarizzati, paroli duci du cori nisciuti, sintimenti d'amuri dilicati comu li rosi quannu su ciuruti. Iu li facìa jornu li nuttati ccu l'occhi aperti e suspiruni muti, suffrìa li peni di li 'nnamurati l'uri, li jorna e tutti li minuti. Unu di ddi jorna mai pinzati, di lu distinu vinnimu spartuti, vosi lu granni Diu dd'occhi fatati unni d'angili tutti su vistuti. L'arma e lu cori miu addulurati, misi a 'na gnuni chiànciunu firuti, nun vonu locu e sunu addivintati, comu a ddi littri... vecchi e sculuruti.