Riflessioni 5 ottobre 2013 · lettura 2 min · 4069 letture

+ Segui

Suspiranno suspiranno chistu core ha fatto n’anno ca affacciato a na fenesta s’addimmanna che le resta. Suspiranno suspiranno comme ‘o paladino Orlanno pe sta vita ha combattuto e mo è viecchio e arruzzunuto. Ero ‘o primmo a s’appiccià: p'o prufumo 'e nu babà, pe na nenna, pe na storia, p'o piacere 'e na vittoria, pe nu juorno sfurtunato, pe nu verso spoetizzato. Era pronto, sempe allero, pure quanno steva a zero, pure doppo a na tempesta se sbatteva pe fa’ festa, pure quanno nu turmiento t’o turceva dint’o stiento. Era masto apparatore mo p’arraggia e mo’ p’ammore... Pe nu vaso dint’o scuro se metteva a fa’ ‘o criaturo... Pe nu spasso senza sorde me scucciava... e chi s’o scorda? Era ‘o rrè ‘e ogne staggione... s’accideva a fa’ canzone... ‘nnante a tutte a musichià era l’urtemo a sfullà... Int’a st’uocchie tengo ‘a sera ca brusciae pe na bannera. Suspiranno suspiranno senza mettere nu banno stu mappino cchiù nun corre e c’o tiempo perde e scorre. Suspiranno suspiranno, stu schiattuso, tutte ‘o sanno: a ‘ntrasatta fa scio- sciò e a sta vita dice no!

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese