70 anne

’A vita nun pazzea quanno te sfotte e si pe caso tiene l’osse rotte propio essa sape allora comme fa’: se mette stantemente a scarpunia’. È mamma ciento vote int’a matina... e si te siente ‘e vote na mappina t’a fa cu tutt’ ‘o core na lavata e accaglia cu pacienza ogne jurnata. Addora ‘e tanti facce ‘e tanta gente ca coseno ddoie mane cu nu niente e fete ‘e tanta gente ‘e tanti facce ca nun te fanno manco dduje rinacce... Ma è pure ‘a cchiù sprennente magaria ca appara tutt’ ‘e buche ‘e miez’a via e quanno ‘mbraccio ‘o sole t’accarezza te scite e truove chiena chesta rezza. E allora sti sittanta ne so tante... so’ tante tutt’aunite si so’ quante e si pe caso nun parono abbastanza stute sti luce e fa parla’ sta panza ca ha suppurtato ‘e schiaffe ‘e chesta vita cu na resata figlia a na ferita... E pure si ‘e nuttate so’ turmiento ’o tiempo passa e t’ ‘e cummoglia ‘o viento... E pure si te pare troppo corta spalanca ‘o cielo e ‘nchiude chesta porta penzanno ca cuntava n’anno fa chello ca ogge maie t’abbastarà.