Dialettali 21 maggio 2014 · lettura 1 min · 6666 letture

+ Segui

E Napule s’appiccia tutte ‘e notte vedenno ca stu munno se ne fotte e quanno ‘o sole stuta ‘a lampadina t’adduone ca sul’essa fa matina. E Napule se guarda dint’o specchio e appura ca stu core tuoio è squaquecchio e canta tutto ’o fele ‘e certa ggenta ca sbatte ‘nfaccia ‘o nniente e nun s’abbenta. E Napule se sceta mmiezo ‘a strata sapenno ca sta vita t’è cainata e quanno ‘o munno ‘o vuote a jacuvella è inutile ca stracce ‘a cammesella. E Napule s’aspetta na lavata sfrunnanno ‘o viento e ‘o friddo ‘e sta verrnata e allucca mmiez’a chiazza cu sta vocca ca ‘o lietto è spertusato e nun se cocca. E Napule te chiamma e cerca aiuto ma sì nu malo figlio e rieste muto e mente ‘o sango scorre e faje ‘o vavuso ’a vita trase e aesce ‘a nu pertuso.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese