Dialettali 24 dicembre 2014 · lettura 2 min · 3493 letture

+ Segui

Ogge sta panza mia è ‘a cchiù ‘mpanuta tanto ca sta cammisa s’è scusuta e chesto grazie a nu patrone ‘e casa ca tene dint’a sacca ‘e sorde spase tanto ca niente io veco ca è rimaso. Ma primma ‘e ripassà pe’ na pruvasa ie voglio fa’ nu brinneso azzeccuso ca vene ‘a int’a chiocca e fa ‘o lappuso. Ie bevo a chesta bella cumpagnia ca ‘a sempe fa cuntenta ‘a vita mia. Ie bevo a chesti facce ‘ncellicciate ca assieme a me se songo cunzulate. Ie bevo po’ a chist’ommo ‘e conseguenza grazie allo quale è toga l’esistenza ca ogge ha miso ‘o figlio ‘ncopp’a terra speranno ca fernesce ‘o serra- serra. Pure si è nato annuro e puvuriello prop’isso ci ha rialato nu curtiello ca taglianno ‘o passato spercia ‘e core e ca se chiamma bella ggente AMMORE. Vino vinello io ca so’ ‘mbriaco te beve n’atu poco e me ne vaco. Vino straniero o vino ca è taliano te beve c’a fermezza ‘e chesta mano. Vino di casa o vino di altre terre te bevo cu stu genio ca m’afferra pecché tu scinne frisco e ie me spupazzo mente na smania antica me strapazza. Vino di Puglia o vino lombardese cu te pure ‘e scalelle songo appese. Vino verace o vino scurtecone fosse ‘nciaruso o fosse sarchiapone me mettesse a fa’ ‘a guardia a sta mappata pecché stanotte addà durmì priata. Po’ vulesse da’ pace a sta valanza primma ca ‘a vene a cuntrullà ‘a finanza... Me piacesse ‘e sta cca matina e sera ma ‘o piello chesto ‘o saje tene mugliera... Me sentesse ‘e ‘ntunà na canzuncella ma ‘a vocca mia è troppo stentarella... E allora nuie aizammo stu bicchiere cercanno ‘e ce scurdà nu brutto aiere... E allora ca strignenno stu fangotto speranno ca chist’anno è nu vintototto ie dico a tutte quante BONA SCIORTA! Facimmo ampressa ca sta vita è corta.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese