Dialettali 31 dicembre 2014 · lettura 2 min · 2704 letture

+ Segui

Chist’anno ammore mio ogge è fernuto e furtunatamente ce saluta. Nun voglio di’ ca è stato malamente ca ha camminato senza scarpe e lente ma ha fatto ‘o locco justo pe’ scuccià e nun tenimmo niente ‘a ce stipà. Chist’anno bene mio ha fatto ‘o fesso purtannece ‘a pavà rogne e ‘nteresso. ‘E sacche ci ha sfrunnate a uno a uno ‘a panza s’è ‘mparata a fa’ ‘o diuno ‘o piello tene ‘a raggia pe’ cumpagna ‘a chiocca cchiù ce penza e cchiù se lagna. Chist’anno core mio è stato allero pe chillo ca fatica ‘o ministero pe sindace assessore e deputate. Cu ‘e sorde nuoste ormai se so’ scarfate e pure si quaccuno hanno acchiappato 'a leggia nosta a casa l'ha lassato. Chist’anno vita mia m'è parzo ‘o stesso ‘e chillo ‘e primma e de chill’ato appriesso. Chi chiagne chi s’accide chi spupazza chi perde chi s'addora e chi se smazza chi ‘a femmena t’a tratta a pisce 'nfaccia e chi restanno appiso è na minaccia. Chist’anno sciore mio è stato futo int’a na fossa ‘e lota mo' è fernuto. ‘O prossimo me pare 'o stesso frate ma è certo ca ce trova appreparate perciò si bussa ‘a porta stu zuzzuso lassallo fora ca enno già schiattuso.

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese