Dialettali 8 gennaio 2015 · lettura 2 min · 2623 letture

+ Segui

Vulesse ca sta vita piacesse a tutte quante ca fossemo diavule oppure chiorme ‘e sante ca ‘o sole ca nascesse purtasse sorde e ammore pe regnere sti sacche pe fa appiccià sti core ca ‘e stelle ‘a coppa’o cielo facessero tutù pe da’ nu poco ‘e sciato a chi nun ci’a fa cchiù. Vulesse ca sta terra nun facesse na cantata sunanno ogne matina p’a gente ‘a serenata ca ‘a vocca nun parlasse cuntanno fessarie e desse ciento vase a chiante e pucresie ca ‘o perito addurasse ‘e na rusella ‘e maggio e ‘o cantero tenesse ‘o scuorno pe curaggio. Vulesse ca sta sciorta mettesse na cammisa arricamata ‘e sango ‘e gente morta a risa ca ‘e tasse t’e pavasse surtanto ‘o deputato e fosse ‘o cchiù cuntento perucchio ‘e chistu Stato ca ‘e zoccole fernessero ‘e fa magnà ‘e ruffiane mettenno fuoco e bbene surtanto int’e tiane. Vulesse ca sta museca ca sona sta zampogna levasse a tutt’e chiaveche ‘a mmiria e pure ‘a rogna ca ‘a freva ca me vene fosse na mmedicina ca trase dint’o cuorpo ‘e chi se fa mappina pe’ fa cuntente ‘e frasche ‘e chella mamma toia c’appila cu na chiacchiera ‘a putechella soia. Vulesse ca stu juorno nun se fermasse maje e annascunnesse e corna ‘e chille ca già saie ca ‘a notte me truvasse annuro int’a nu suonno e m’arapesse ‘e pettole ‘e tutte quante ‘e gonne e i’ ce trasesse ‘mpilo restanno sempe stiso scramanno accalummato “Mo’ stongo ‘mparaviso!”

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese