Dialettali 9 aprile 2015 · lettura 1 min · 2800 letture

+ Segui

E quanno ammore pizzica stu core ie sento ‘nponta ‘a lengua nu sapore ca amaro e doce comme a chesta vita me porta ‘ncielo e ‘nterra e fa ‘o samento e arape dint’o pietto na ferita ca me spetaccia ‘a carne e so’ cuntento. E quanno ammore chiamma a fa ‘a nuttata ie pazzo ‘e te me faccio serenata e canto e sono e sono e canto ogn’ora e cerco ‘e avè ‘a chisti uocchie ‘a tirrannia ca piglianno d’o sango ‘a scurciatora ‘mbriaca e me scumbina ‘a vita mia. E quanno ammore bussa a stu purtone me ‘nzerra tutt’e porte e fa ‘o patrone e ie ca songo sorece e mappina me pare ‘o cchiù cuntento carcerato ca ‘o sole e chesta vocca ogne matina me vasano e me lassano appicciato. E quanno ammore è sulamente ammore ‘a gente va sparlanno ‘e chistu core ca te ‘nturcina spaseme e passione ca se fa friddo mente tocca ‘o fuoco ca se ‘nfessisce mente fa ‘o lione e allero o triste maje cagnasse juoco.

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese