Dialettali 6 dicembre 2017 · lettura 5 min · 1608 letture

+ Segui

Quanno nascette ‘o Ninno int’a sta scola (si mo v’o conto ‘o core se cunzola), nun scegliette na classe assaie elevata ma na classella ‘e alunne stanfellate... Nun se purtaie né scorta, né angiulille, e nn’avvisaie manco ‘o dirigente, ’o preside, ca scuro e ‘ntussecato, pe via ca nun l’aveva interpellato, pe tutto ‘o tiempo ca ce rummanette, manco na vota, po’ vede‘, scennette... Anzi ‘e mannaie ‘o sfratto ‘a na bidella (chella ca parla scigna e aggrazziatella) e ‘ncoppa ‘a carta steve scritto gruosso: " Io questo affronto sopportar non posso! Secondo il comma della legge tale, questo è un abuso che non tiene eguale. Non parmi giusto che un giorno sì acclarato abbia a dimora un vano sventurato. Tutta ‘a sacra famiglia iesse a spasso, immantinente: a me me serve ‘a classe!” Quanno nascette ‘o Ninno int’a sta scola (ie v’o ripeto parola pe parola), ’o segretario, che ha la sua importanza, tre juorne se ‘chiudette int’a na stanza, liggenno libbre, leggi e circolari... Essendo che era un caso dei più rari, jeve cercanno ‘a zella, il giusto appiglio, pe ne manna’ ‘o pate, ‘a mamma e ‘o figlio. ’O quarto juorno scennette carruzziato, cu tutte quante ‘e carte appreparate. Davanti ai media e con ostentazione, sprolloquiaie la sua dissertazione: "Chi siete? Cosa fate? Che volete? Senza domanda stare non potete! Io rapprisento l’amministrazione e pe sta cca ce vo: assicurazione, sette certificate e quatte vaglia. Chesta scola n’è fatta p’a marmaglia! Se... poi... tenete un santo in Paradiso, allora...è un’altra cosa, avete ‘ntiso? Ma dato che è evidente vuie chi site, tempo quacche minuto e doppo: ASCITE!" Quanno nascette ‘o Ninno int’a sta scola (e chesto v’o presento senza stola), quatte prufussuresse, ‘e cchiù appicciate, tremendamente offese e ‘mpernacchiate, saglietteno addo Dio, ‘o Pate, ‘o Masto, (credennese ‘e tucca’ pure stu tasto) e pe quatte ore, comme a machinette, parlarono di merito e rispetto, d’alto lignaggio, logica e diritto, mente ‘o Signore s’e senteve zitto. Pe urdema sbuttaie ‘a lacrimosa, chella ca tene ‘a vocca chiena ‘e rose, ca ‘o Pataterno vulette ‘mpressiuna’ tuccanne ‘o tasto d’a legalità: "La nostra gente non è ben lodata! Essa che degnamente è costumata perché assottiglia legge ed uguaglianza, a Voi con gran disdegno porge istanza ché il suo vivo duol porti consiglio per dar più lustro sito al vostro figlio." Il Padre nostro che è un gran signore, senza scomporsi, chiammaie nu servitore e quello, tosto, cu na mazza tanta, ’e benedicette a turno tutte quante: "Pe chi nun tene core chesta è ‘a tassa, tutta ‘a delegazione fora... a spasso!" Quanno nascette ‘o Ninno int’a sta scola (nisciuno ‘vuie me po’ leva’ ‘a parola), alla notizia nuova, mamma mia, pe tutta ‘e strate ci fuie l’ira ‘e Dio: cori, proteste, manifestazione... tracche, granate... che rivoluzione! Trenta docenti e cientovinte alunne facettero tremma’ ‘o cielo e ‘o munno... ’Ncoppa ‘o giurnale e pe televisione, vulettero scama’ tutta ‘a quistione: "La legge vien stravolta e ‘o Pataterno reca ferale torto a noi... che Inferno! Pecché na classe ‘e alunne smullacchiate ca è fatta ‘e cape sciacque e sciaurate? Il meglio vuole il meglio ed il Bambino, essendo che per nascita è divino, ha fatto enorme oltraggio a tutti noi, nascenno miezo ‘e zalle, in mezzo a voi!" ’O Bammeniello, sentenno l’accoglienza, a poco a poco se perdette ‘e senze... Chiammaie ‘a Madonna, Peppe, ‘o ciuccio e ‘a vacca, e zitto zitto asceva d’a “baracca”. ’A bella gente fuie assaie cuntenta e chello ca alluccava ‘o sape ‘o viento... Sulo ‘e guagliune d’a classe sbacchettiata priaino: "Gesù, nun ce lassate! Na vota ca ‘a furtuna ha apierto l’uocchie, restate, v’o chiedimmo, ccà...’nginocchio." Gesù ‘e guardaie, penzaie e se fermaie... Zenniaie a’ mamma e o’ pate e se turnaie: " E’ vero, è giusto, degno e sacrosanto! Il Cielo vuole che io vi resti accanto. Pe n’attimo aggio perzo ‘a direzione, sulo pe sta a sentì chisti schiattune ca, avenno tutto, tutto vonno ave’. Ammore ie porto, speranza... n’ata vita, fede ca ‘a fa cchiù ricca e sapurita, e chistu patto nuovo è senza faccia, nun parla, nun ce sente e nun minaccia... Nun cerca sorde, nun venne e nun s’accatta... Conta sulo che faie e comme aie fatto." E senza guardà ‘nfaccia cchiù a nisciuno s’e vasaie e abbracciaie a uno a uno... e rummanette cu loro tanto e tanto ca chella notte fu overamente Santa... Se dice ‘o munno è ‘nfame e tu a sape’... ’O tiempo passa e cagna ogne canzone e tu ca aspiette ‘a sempe l’ora bbona, p’ave’ nu poco ‘e sole e ‘a dignità, e ‘a chesta vita “pari opportunità”, pienze: “Sta sciorta nu juorno cagnarra’?” Quali belle parole! Legnono ‘o core! Ma tu l’he maie assaggiato stu sapore? Chi sa si doppo ‘ncoppa, chi fa ‘e cunte, segna ‘e virgole, ‘e pause e pure ‘e punte. Spero, sperammo, mente facimmo ‘a famma... Ma è Natale, guagliù, iammo: CANTAMMO!

♥ 1 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese