Dialettali 4 luglio 2018 · lettura 2 min · 1665 letture

+ Segui

Si t’è ‘mparato a fa’ meza vessecchia e siente ‘a chiocca e nun surtanto ‘a recchia... Si attienne senza spennere nu sordo e nun te pierde appriesso a nu milordo... Si l’uocchio vede comme a na criatura e ‘a notte nun te mette cchiù appaura allora sì crisciuto overamente e può marcià sicuro miezo ‘a gente. Si ‘o piello regne ‘o piatto ogne jurnata e l’ora nun se perde a fa’ ‘a pupata... Si ‘nfaccia ‘o viento spienne na resata e ‘o mare trabbagliuso è serenata... Si ‘a smania vene sulo pe’ squiglia’ e ‘a freve te fa ‘o stesso cammena’ allora tiene ‘o sango dint’e vene e overo può schiantà turmiente e pene. Si ‘a ‘mmiria nun va appriesso a nu scunnietto e ‘a raggia nun se perde a fa’ despietto... Si ‘e suonne songo sulo na partenza e ‘o locco nun’o chiamme sua ‘ccellenza... Si ‘a vita campa e more cu passione e ‘o core sbatte comme a nu lione allora t’è servuto chesta scola e certamente tiene tacche e sole. Si ‘a penna sape fa’ nu verzecciullo e ‘a mano nun se schiova nu pezzullo... Si ‘e cosce vanno sule ‘ncoppa ‘o monte e ‘a vocca sape mettere ddoie jonte... Si ‘a capa nun rummane peccerella e ‘o piezzo ‘e carta fa tuccà na stella allora pozzo ‘nchiudere sta porta e salutanno dico: BBONA SCIORTA!

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese