Dialettali 22 agosto 2018 · lettura 2 min · 1497 letture

+ Segui

‘O sale nun me serve ‘a coda s’è spezzata nenné ‘ncopp’a ‘nzalata che pozzo ‘nfarena’? ‘A ‘nzogna s’accatasta ‘a sarza è gghiuta acizza nun bastarrà na zizza pe farme squaquiglia’. Abballammo abballammo stu juorno sta annuro e sta cca’ senza scuorno e chiamma e nun sente ‘a miseria ca dint’a sta capa è paupèria. Abballammo abballammo stanotte vulesse fa’ almeno ddoje botte jucanno ca freva e c‘o viento ca scioscia e s’avota a turmiento! ‘O sole fa ‘o malato ‘o lietto nun se sceta sta vita è comme a preta nun saccio cchiù sbaria’. ‘O cielo nun m’aiuta chist’uocchie so’ cecate sti mane ddoje palate e vonno sbrennulia’. Abballammo abballammo depenne si chiagne sta chiocca nun ‘ntenne e dint’a sta sacca ‘a scummessa c‘a sciorta se sfronna e va ‘e pressa. Abballammo abballamo guagliune ca ‘o cuorpo nun saglie ‘e gradune ca ‘o chiesa nun sente ‘a campana ca l’acqua nun regne ‘a tiana. ‘O core se sturciglia ‘o fegato se guasta ‘a perterca se ‘mcrasta ‘o riesto vene e va. ‘E note vanno lente ‘o masto nun se move chi ‘o sa si ‘a cielo chiove e ‘o ‘mbrello può piglia’. Abballammo abballamo che ‘nziria l’ammore s’accocchia c’a ‘mmiria ‘e vase nun sanno cchiù ‘e niente ‘a luna sta llà ‘ndifferente. Abballammo abballamo ca doppo ‘o poco s’ammesca c’o troppo ‘a sciorta se spoglia e ‘ntramente chi schiatta pe primmo è fetente.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese