Dialettali 2 gennaio 2019 · lettura 2 min · 1428 letture

+ Segui

Auguri a chesta Italia na granne tavuliata addo’ ce sta chi magna e chi cu te sparagna. Auguri a chi cumanna e mette ‘e meglie panne mente p‘o cumannato rummane ‘o sbummecato. Auguri a chi è furcone e fa ‘a rivoluzione penzanno già ‘o sapimmo (e cca me serve ‘a rimma) ca ogge fa ‘o curtiello dimane è Masaniello. Auguri a tutte ‘e tasse a chi putenno ‘ngrassa e a chi tiranno ‘a corda s’appara cu ‘e ricorde. Auguri a sta città ca canta pe’ campa’ e mo ca è cchiù carnale ce sonarrà papale: “Staie certo ca ‘a menesta aumenta assieme a festa.” Auguri agli impiegati ‘e chesta razza bella ca già se so’ apparate ca ‘o scisto p’a scarzella esce pe nu purtone e trase int’o cazone. Auguri a chesta vita ca è na brutta zita e ca cu tutt’e ‘mbruoglie chi ‘o sa si po’ c’arrecoglie. Auguri a certa gente ca tene aperte ‘e recchie e nuie ca simmo specchie campammo c‘a speranza e figlie ‘e na crianza sfuttimmo mierle e sante: "Auguri senza chiante! Auguri a chi ce sta a chi se sta a ratta’ a chi ce sape fa‘. Auguri a chi è capone e forze va ‘mpenzione e a chi ‘e riffe o ‘e raffe s’alliscia ‘o musso e ‘o baffo." Auguri finalmente a ‘o bbuono e ‘o malamente a te ca sì lamiento e a me ca so’ nu viento ca scioscia ‘ncoppa ‘a carta e nun ricorda ‘a parte.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese