Dialettali 10 gennaio 2019 · lettura 3 min · 1674 letture

+ Segui

‘O spitale comme giura masto Dante è ‘o munno addò ‘o diavule fa ‘o santo. Ciccillo sempe sperzo ‘mbracci’a morte te segna ca ‘o piacere è ‘a malasorte. Petrarca ‘ncannaccato cu l’ammore vace cantanno “scazza e dà dulore.” Giuvanniello chiappino e spasemante t’o fa senti’ cchiù tuosto e miettennante. Battista ha scritto allora ca è nu jetto e tene ‘a capa sempe sotto ‘o lietto. Ariosto ca enno pippa e rimbambito t’o piazza ‘ncopp’a luna a fa’ ‘o svanito. Machiaviello sperto ‘e gente e delegente t’o serve a chi è principe o è pezzente. ‘O Guicciardino bello assistemato t’o schiaffa ‘ncopp’o lietto scammesato. ‘O Tasso ca s’è perzo c’o cerviello nun vulesse trasi’ int’o canciello. E Galileo scienzìato c’o fanale t’appura ca enno ‘o stesso tale e quale. Alfieri ca pazziava c’a suramma s’o stregne stritto stritto comme ‘a mamma. Goldoni ca pareva cchiù allummato ‘ncoppa ‘o palco faceva ‘o timmorato. Foscolo ca teneva ‘o cunfessore l’addedeca sunette ogni quatt’ore. Leopardi miezo sciunco c’o martiello ‘o senteva dint’o sango e che maciello mente Manzoni cantava cu Lucia e ‘o ‘ncuntrava ogne notte miez’a via. Carducci ca penzava a San Martino senteva ca puzzava sempe ‘e vino mente Giuvanne scurnuso e senz’o pate c’a cavalla turnava a fa’ ‘o pilato. D’annunzio se sparava allero ‘a posa e allora dint’a l’acqua t’o spertosa. Ungaretti carnacotta e misteriuso se cunfida ca ‘o vulesse cchiù schiattuso. Pirandello ca pazzea c’o mese ‘e maggio se crede ca sul’isso è ‘o personaggio. Quasimodo ca ‘e sera fa ‘o primario te dice ca cercasse ‘e ave’ ‘o cuntrario. Montale c’a mugliera ‘ncoppa ‘e scale te dice quanno ‘ bbona ‘a caposala. Pavese ca sbatteva cu ‘e penziere curreva proprio areto a nu infermiere. Moravia s’ammusciava tutt’a vita luttanno notte e juorno sta partita. Ma è ‘o politico piezzo ‘e spulletrone c’ha miso tutte ‘e sorde int’o saccone e ‘o direttore ca ‘mbroglia sta matassa c’o primmo ‘nchiude l’uocchie e vace a spasso. Sulo ‘o malato strutto e strannizzato ‘ncopp’a barrella attenne ormaie scurdato.

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese