Dialettali 17 aprile 2019 · lettura 2 min · 1278 letture

+ Segui

E quanno sott’o cielo e ‘nfaccia a terra ‘a smania ‘e spantecà stu core afferra se sente na canzone sdellummata ca m’arricorda ‘a primma ‘nnammurata ca pe’ nu vaso dato a cazzo ‘e cane vuleva sentì sciogliere ‘e campane ma dato ca l’ammore era cecato se ne fujette e ne truvaie a n’ato. E quanno dint’o cielo ‘nchietta a luna ‘o genio ‘e fraveca’ cerca furtuna ie canto sulamente c’a passione ‘e chi se sceta muto e quacquarone e bussa a ogne porta ‘e chesta vita credenno ‘e te sfrunna’ sta margherita sicuro ca ‘a tempesta o primma o doppo se carma e tutt’o riesto saglie ‘ncoppa. E quanno mmiez’o cielo cu sta chiocca ‘a vocca pe’ parla’ se fa ammilocca t’accuorge ca a sta zitto è nu piacere e scuorde ogge che l’he ditto ajere credenno ca na lengua ca nun sciata spertosa carne e pelle e fa ‘a scellata per cui lo quale cara mia devota ‘a stu mumento ie te cagno ‘a rota e me ne vaco sperzo dint’a neglia pecché a sta sulo chesta è ‘a vota meglia.

♥ 2 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese