Dialettali 25 aprile 2019 · lettura 2 min · 1394 letture

+ Segui

Ommo ‘e niente ‘a libbertà chi ce crede ca ce sta? Ommo ‘e niente chi ce more e nun sape manco ‘a addore. Ommo ‘e niente chi t’a vota ie ‘o chiammasse ommo ‘e lota! Ommo ‘e niente chi sta ‘ncoppa primma ‘e ogge e pure doppo! Mamma ma’ che libbertà ca se vede p’a città! Na cravatta a sei culure cu na faccia ‘e nu criaturo ‘e capille lisce e scise tene ‘ncuollo tre cammise va giranno tutt’o juorno cu nu mare ‘e ggente attuorno. “So’ scugnizzo d’a Turretta n’aggio acciso na carretta!” “So’ guaglione ‘e San Giuseppe dint’a sacca tengo ‘e streppe!” “Ie so’ stato sfurtunato m’hanno acciso a ‘o viscuvato. Chillu juorno nun ridevo songo muorto ca durmevo.” “So’ monarca e so’ fascista e dimane socialista!” Ah quant’anne so’ passate! E che guerra e che mazzate! Pe’ nu popolo pezzente ce sta sempe nu fetente. M’hanno ditto ch’hanno acciso steve miez’a chiazza appiso. Viva viva ‘a libbertà e chi ‘a canta pe’ magna’! Viva viva ‘a libbertà menu male ca ce sta! Chi se guarda dint’o specchio nun s’accorge ch’enno viecchio. Chi se scorda ‘a dittatura ca è cchiù brutta ‘e na fattura. Chi te dice nun me ‘mporta tu lassallo for’a porta. Chi se venne e resta sotto è surtanto nu vintotto. Ommo ‘e niente ‘a voccadora ca s’a scorda ogne mezora. Ommo ‘e niente ‘o colpo ‘e stato int’o suonno ci ha pigliato. Ommo ‘e niente ‘o cittadino vò scurda’ bevenno ‘o vino. Ommo ‘e niente ‘a libbertà e chi a’rrobba add’a scaca’!

♥ 1 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese