Dialettali 5 giugno 2019 · lettura 1 min · 1310 letture

+ Segui

Miettece ‘o core dint’a chesta chiocca pecché sul’essa sola maje nun schiocca! Pretienne sempe ‘o meglio ‘a sta cummara e va sbarianno comme ‘o sole schiara aunito a na speranza maje fernuta appiso a na certezza maje vestuta. Abbrusce dint‘o fuoco d’o sape’ pecché nisciuno doppo è comme a te e resta sempe ‘nzembra a sti penziere ca corrono e nun trovano quartiere ca vanno e nun se vonno cchiù ferma’ pecché so’ ‘e figlie ‘e chi te fa vula’. ‘Nzerra ogne vocca e siente tutt’e mane ca danno e nun’attennono dimane. So’ nate e so’ crisciute a chesta scola purtanno e scauzettanno ‘a mussarola. So’ stelle ca nisciuno po’ stuta’ è lampa ca stu munno po' appiccia’. Stienne sti bracce e arape chesta chiocca ‘mpasta c’a smania freve sango e vocca e nun scurda’ stu tiempo e chesta vita ca quanno pare amara è sapurita e gira chesta rota c’a passione ‘e chi lassanno annuro stu cupione ha scritto tremmulianno ‘ncopp’a porta saglienno chesti scale: “Bbona sciorta!”

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese