Dialettali 12 giugno 2019 · lettura 2 min · 1338 letture

+ Segui

’O tiempo int’a niente è passato. ’O tiempo cu niente è vulato. Tre anne... ve pare na vita! Tre anne... m’è parzo nu sciato! Tre anne a spera’ e a sunna’ a crescere ‘nzieme ‘o studia’. ’A storia, l’ingrese, la scienzia Madonna! Che santa pacienzia! ’E regole ‘e prove ‘a lettura a scola è na santa rottura! Te dà chillu pizzico ‘e sale ca dà cchiù sapore ‘a menesta... ma mo’ ca è fernuta sta festa, te tocca ‘e cagna’ ‘a visuale... ’A vita llà fora m’aspetta cu ‘e bracce cchiù grosse d’o munno ma ‘o triemmolo ‘e scennere affunno me piglia m’astregne e me jetta. ’A vita na lotta tremenda nu salto cu l’uocchie int’o scuro na corza cu ‘nfaccia nu muro ca guarda ca parla e nun sente! Se dice: " Ce sta chi ce penza: na mano... nu pate... nu santo... e bbuono te va tutto quanto si tiene na canna c’a lenza. ’O verme se move e se torce... ’O pesce ce care e se votte... Nun vede ca l’amo s’o fotte e quanno s’addona è già muorto! ’A vita mo’ bussa cchiù forte! E’ tiempo ca porta ‘a sagliuta è tiempo ca ‘o sanghe t’aiuta e scorre e t’arape ogne porta! E’ tiempo ‘e te scegliere ‘a via cuntannete ‘e passe ca faie cercanno ‘e scanza’ quacche guaio. E’ tiempo ‘e lutta’: c’alleria! Rummane surtanto ‘o saluto pecché chistu juorno è fernuto e ‘a vita s’o porta c’o viento speranno ca scorda stu stiento! ’A sta ‘nzieme a vuie io campavo: Augurie amice e cumpagne! ’A sta ‘nzieme a vuie io sunnavo: Augurie a ogne passo ca date! ’A sta ‘nzieme a vuie io vulavo... Speranno ca po’ me la cavo... Speranno ca po’ me penzate... Augurie e sta vota: cantate!

♥ 2 💬 2

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese