Dialettali 1 agosto 2019 · lettura 2 min · 1228 letture

+ Segui

Na vota steve ‘o rrè ca aunito ‘a tirannia faceva ‘e fatte suoie cu tanta ‘e schifenzia. E quanno po’ ‘e prureva vulennese sfuca’ se ‘nzapunava a mammeta senza n’ave’ pietà! Però fra tanta cantere può darse ca sì tu chillo ca dint’o sango tene nu ‘nguacchio blu. Po’ se n’ascette Atene ca scapuzzaie ‘e catene e fuie na nuvità na vera sciccheria capace ‘e te ‘nventa’ propio ‘a democrazia. Ma ‘a femmena vulleva e a niente cchiù serveva ‘nchiusa spartanamente signata a fa’ ‘a ‘ntramente. Cu Cristo ‘a coppa’a croce scennette ‘o poco ‘e doce ca simmo tutte frate ca simmo tutt’e stesse ma ‘a Chiesa po’ dicette ca ‘o munno è perepessa. Chi arriva primma ‘nzerra int’a stu serra- serra ma po’ s’adda’ suffri’ pecché nun puo’ capi’... E ‘a femmena? Nun conta! E’ sulo meza ionta ca porta alla malora ca ‘a sempe è ‘ncuitatora. Cchiù tarde ‘a borghesia vulette spuntuna’ luttanno p’a valanza ca pesa l’uguaglianza. E quanno po’ ca ‘a storia le dette ‘a libertà facette zumpa’ ‘a capa propio a sua maestà. E ‘a femmena traseva sulo pe’ sciaveca’ ‘o piello ‘mbuttunato ‘mbraccio a fraternità. Ma doppo tanta secule cristiane e socialiste fede e rivoluzione scrivettero ‘a canzone ca te purtaie stu popolo gnurante e bannitore pronto a se conquista’ sovranità ed onore. E chesta santa guerra ci ha dato ‘a parità e ogge pure ‘a femmena è bbona a cumanna’. Ma ‘a vita m’ha ‘mparato ca ‘a smania ‘e dì “Fa’ cca!” afferra pure ‘e sante vutate a fa’ vuta’ e comme ‘ncoppa ‘o trono se ponno accomoda’ allora che vuò ‘a me: sarrà turnato ‘o rrè!

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese