Dialettali 8 agosto 2019 · lettura 2 min · 1390 letture

+ Segui

E tu ca parle senza dì parole ca dessero a sta vita ‘o poco ‘e sole me guarde cu na faccia ‘e ‘mpustatore me siente cu ddoie recchie ‘e nzurdatore cu tutt’a ‘ndifferenza ‘e sta jurnata ca stesa dint’o scuro p’a nuttata passata a te chiamma’ cu appucundria me ‘nchiude ‘e porte e cerca n’ata via pe’ cosere nu poco ‘e arrassusia ‘ncoppa a sta terra chiena ‘e purcaria. E ie ca cerco ancora n’arricietto ca desse a sta speranza nu scunnietto te veco cu sti mane attuorn attuorno ca cercano sta vocca senza scuorno cu tutt’a ‘mpertenenza ‘e na canzona ca vole accumpari’ sempe guagliona mente c‘a freve mamma ‘e sta malora vulesse arrecenta’ na scurciatora pe’ tegnere stu munno ‘nturcinato ‘nfaccia a nu cielo niro e turmentato. E nuie ca simmo tiempo senza ore parimmo ‘a ‘mpertenenza ‘e nu pittore ca tegne chesta tela smatrecata comme si fosse ‘a primma ‘nnamurata... E nuie ca simmo varca senza viento campammo accarezzanno stu lamiento ca bruscia comme coce sta jurnata ca vò capi’ sta vita che ci ha dato ca chiagne dinto a l’uocchie ‘e na criatura pecché int’a notte s’è sentuta annura.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese