Dialettali 18 dicembre 2019 · lettura 2 min · 1662 letture

+ Segui

Quanno è Natale ‘a ggente fa riale pecché chesta jurnata è assaje speciale e pure si ‘o stipone mio è vacante io faccio doni suono fischio e canto per cui lo quale sotto a l’alberello vuie ce truvate Peppe cu stu ‘mbrello ca v’ha purtato justo pe’ paria’ quatte penziere senza ‘nfamità. A te ca puntualmente sì malato nu bello lietto ‘e fierro spingulato... A te ca sì na fronna ‘nfaccia ’o viento nu cippo pelle e ossa chino ‘e stiento... A te ca tiene ‘o core abbuttunato n’a votta ‘e ciento vase scancellate... A te ca addure sempe e sulo ‘e sorde na borza svacantuta e sei caiorde... A te ca sì impiegato comunale na vota all’anno almeno puntuale... A te ca vuò ‘e stu munno ‘a finitura sei prugne mosce e ‘o poco ‘e accuppatura... A te ca t’accuntiente ‘e t’agguazza’ na ponte ‘e genio e ‘a forza ‘e ‘nciapeca’... A te ca sì abbastanza suspettuso na busta ‘e mare spuorco ‘o cchiù zuzzuso... A te ca cu sta banca sì falluto nu bello pere ‘e puorco addecuttuto... A te ca cu sta vocca sì giurnale nu sparatrappo e ll’aria intestinale... A te ca pierde ‘a capa p’o pallone ‘a sarza cchiù sciapita ‘e na passione... A te ca ce cumanna e spiercie ‘a sacca nu chilo ‘e sfrantummate e na patacca A te ca staie assettato e aspiette ‘a festa t’abbasta ca te magne sta menesta e ‘o faje comme a chisti tre angiulille ca cantano a nuvena a chiste e a chille pe purta’ pace ammore e umanità a chi ce mette core e volontà e a me ca cu ‘a ‘nfamona aggio jucato nu poco ‘e sole e n’atu poco ‘e sciato! Auguri miei signori: ammo pazziato!

♥ 1 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese