Dialettali 9 dicembre 2020 · lettura 2 min · 1155 letture

+ Segui

È Natale! Che piacere! Pe sta festa ‘a tradizione te po’ da’ chell’occasione p’a fa’ grande e assaie cianciosa. E pe chesto... che penziero: mo’ prenoto ‘o pasticciere! “ Pronto, Affò, ie songo ‘a Sbreggia... Sì, Carmela ‘a scassaseggia... Bravo! Giusto, sì preciso! Siente, bello, aggio deciso: apprepare doie cassate, mustacciuole, roccocò, raffiuole, pastarelle, tre spumante e ‘o limoncello, struffulille e na pastiera e me manne a primma sera. Comme he ditto? Nun te va’? Ce sta ‘o cunto ‘e n’anno fa? P’a miseria, E che sarrà?... Pover’ommo! Disgraziato! Va a munna’ chi t’ha ‘nzertato! “ Guarda un po’ sta gente ‘e acquazza... Ih che brutta malarazza! Ma ‘o Natale è nu piacere! Mo’ te chiammo ‘o salumiere... Senza pane e companatico, chesta festa enno servatica. “Pronto, parlo con Arconte? So’ ‘a signora ‘e sotto ‘o ponte... Ecco! Propio chella là! Giacumì, mietteme a parte diece chile ‘e vermecielle, chille a bronzo ‘e mast’Aniello, quatto scelle ‘e baccalà, quacche toia specialità, ‘e lenticchie c’o rinforzo, ‘a farina a tutta forza, uoglio, vino, muzzarelle, sfizio, crema e vallanelle... Niente cchiù? Comme vuò tu! Si vuò mettere doie scioce, mitte pure spogne e noce... Eeehhh, maronna, n’allucca’! Mamma mia, ma che ce sta? Tengo debbete a migliare? Nun’è overo! Nun me pare! Sì fetente! Nu pezzente! “ Ma addò ‘a trovo certa gente? Ih che juorno s’è apparato! Meno male ca Diodato, c’appartena a n’ato stato nun me guarda int’o pignato. Enno n’ommo ‘e qualità! Niente a me me negarrà. ‘O Natale è nu piacere! Senza fronne e ‘mmaretata nun’è onesta sta jurnata. “Pronto, caro, so Carmela: faccio parte d’a clientela. Chesta sera passa Alberto: tu apprepareme a cunzerto: frutta fresca a volontà, ‘a verdura a t’abbuffa’, puparuole, mulignane, frutta esotica, patane, ‘a menesta, l’ananasso e, si ‘o tiene, ‘o poco ‘e spasso. Certo, songo ‘a Scassaseggia, maretata, nata Sbreggia, ‘a signora ‘e sotto ‘o ponte... E tu invece ‘e tiene ‘nfronte! Scrianzato! Sapunaro! Che schifezza ‘e verdummaro! “ Ma che d’è? Neh, che guardate? Pure a vuie n’aggio pavato? Che scuncierto! Che mestiere! Stu Natale: CHE PIACERE!

♥ 1 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese