Dialettali 2 gennaio 2021 · lettura 1 min · 966 letture

+ Segui

E so’ sittantaquatto e che vuò fa’! ‘E na manera ie m’aggi’a appiccica’ cu sta madamma doce corta e amara ca quanno ‘a scarfa ‘o sole è na janara e gira vota e gira int’a sta chiocca e assieme a n’atu ‘mbruoglio nun se cocca. E so’ sittanquatto ‘e carna mia cu tanta ‘e freva e chella frennesia ca scenne saglie e scenne ciento scale e arape ogne mumento stu giurnale addò ‘nce truove chesta chiacchiaressa ca parla sona canta e vace ‘e pressa. E so’ sittantaquatto oi ne’ t’o giuro e stanno pitturato ‘nfaccia ‘o muro cu chella smania sperza e scarugnata ca spisso troppo spisso m’è cainata e tutt’e sere ‘nciarma ‘a stessa cosa e ca dimane è ancora na cemmosa. E so’ sittantaquatto dint’a l’ossa int’a sti véne e si le vène ‘a mossa senza sciata’ ride chiagne e scassa e po’ sfuttenno ‘o core fa ‘a smargiassa pecché sta ‘nfama è ‘a primma culumbrina e vasa stu sciaurato ogne matina.

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese