Dialettali 14 aprile 2021 · lettura 1 min · 1126 letture

+ Segui

E sotto a sta muntagna ‘e tiempo perzo ’nce dorme nu criaturo ‘a quanno è nato ca sonna tutt’e notte e n’ha ‘mparato ca nun cumanna niente e fa ‘o surdato. E appriesso a sta mappata ‘e sentimente ‘o core s’apprepara a fa’ na festa speranno ca int’o viento ‘e sta tempesta almeno ‘o poco ‘e sole ‘mpietto resta. E areto ‘e panne ‘e sta mignatta annura ‘o cielo se ne fotte e nun te ‘ntenne e mente ‘a capa perde voglie e penne ‘a vocca parla a sbafo a vienetenne. E ‘mbraccio a chesta sciorta femmenella sta merca guarda ‘nfaccia a sta patacca ca volle dint’o pietto e dint’a sacca sapenno ca ogge munno tene ‘a fiacca. Viene cu me e cunteme nu poco sta sciorta ca se stuta dint‘o fuoco. Viene cu me e famme sfrennesia’ surtanto quacche ora pe’ pietà. Viene cu me e miettece curaggio c’o piello nun s’accocchia c’o sarraggio. Viene cu me e famme trastulia’ c‘a ggente cchiù nun sape tuzzulia’.

♥ 1 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese