Dialettali 28 aprile 2021 · lettura 2 min · 1011 letture

+ Segui

Penzava ‘o rusecone mente ca nu guaglione a Roma s’o purtava p’apprepara’ nu ‘nzajo: “Mo vaco a fa lezione! Int’a stu parlamento ’o trovo quacche ‘nguento ca me fa cunzula’. È bello a se ‘mpiccia’!” E comme se sentette libberato ’o cuccio muro muro lemme lemme giraje pe’ tutt’e stanze e scupirchiaje cose ca nun puteva sape’ maje. Pe primma canuscette ‘a ‘ntapechera ca ‘nchiusa int’a na stanza fino a sera ’nzurfava pustiava e se regneva a faccia ‘e chi te cerca ‘e quaglia’ ‘a neve. E ciento cose e ancora n’ate ciento ’mbruoglie ca p’e cunta’ te vene ‘o stiento... Doppo passaje ‘e stanze cchiù vicino e pure là madonna che scumbino... Sorde ca nun capisce maje addò vanno gente c’a faccia nera ammazzaruta uocchie ‘ngrifate e vocche sustenute. Na cosa nun capette e se dicette: “ Ma chi cumanna? Chi porta chesta varca? ’E cumandante pare ca so’ tante: na bella mappatella ‘e spasemante. Ce sta surtanto ‘o masto ma n’è niente: è pupatiello mmiezo a chesta gente.” Allora se sentette scunfidato e concludette: “ Troppo aggio ‘mparato! E’ meglio ca mo’ torno rusecone miezo a sti lupe ie so’ nu pecurone. Si resto ancora dint’a a sta quartamma (che bbella razza) io agliotto friddo e famma.” E comme se scuntraje cu nu chiachiello ‘nchiudette l’uocchie e se chiammaie ‘o curtiello.

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese