Dialettali 8 dicembre 2021 · lettura 2 min · 1007 letture

+ Segui

Natale... pecchè? Pecché ‘a storia è sempe ‘a stessa: ce sta ‘o fisso e ce sta ‘o fesso... Chi c’a scusa d’a famiglia pe’ nu sfizio s’accapiglia... Chi sentenno sta cantata pensa sulo a na magnata... Chi te dice che sta attiento ma po’ tanto nun te sente... Chi t’e conta crure e cotte ma po’ sballa e se ne fotte... Chi t’accatta chi te venne chi te sfratta chi te spenne chi te porta male ‘e cunte chi te vanta chi te ‘ncanta chi te canta ‘a stessa storia ca sapimmo già a memoria?... Natale... pecchè? Pecché ‘o Ninno t’arricorda chello ca ‘o dimane scorda? Che l’ammore è nu mutore ca dà senzo ‘e juorne nuoste ma po’ manco a farlo apposta manca propio ‘o primmo attore? Che so’ frate tutte quante janche russe nire e gialle ma po’ pienze ca so’ palle e t’abbasche ‘nchietta ‘e sante? Che sta vita è na prumessa pe nu munno arruvetato ca ‘o vulesse cchiù aggraziato ma po’ ‘o giro è sempe ‘o stesso? Ca ‘a famiglia è na priezza nu recanzo a tutte ‘e guaje ca dà pace e... comme ‘o faie truove rutte ‘o lietto e ‘a rezza? Natale... pecchè? Pecché ‘a stalla è fredda assaje? T’accappuotte e te ne vaie. Pecché ‘o munno è cchiù fetente? Nun te smove ‘o riesto ‘e niente. Pecché certe stanno fora? Sarrà gente senza core. Pecché ‘a famme è na tortura? Tu t’abbuffe... chesta è ‘a cura! Pecché ‘a storia è sempe ‘a stessa: ce sta ‘o fisso e ce sta ‘o fesso! Natale... pecchè?

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese