Dialettali 9 novembre 2022 · lettura 2 min · 845 letture

+ Segui

‘Ncoppa a sta terra fatta ‘e farzarie ‘a parte ca tenimmo è sempe ‘a stessa chi smaneca cupianno ‘a pavunessa chi chiagne sgravuglianno litanie. Chi saglie p’appunta’ meza vessecchia chi fraveca sbarianno nu scunnietto chi scenne pe’ da’ sciato a n’atu lietto chi appriesso appriesso ‘nciampa e fa fetecchia. E comme ha scritto Pirandello ‘o masto nuie simmo cientumila e po’ nisciuno e si te spriemme pe’ te fa’ quaccuno te scite puntualmente nu pullasto. E sbatte pecché ‘o core se scumbina e affanne pecché ‘a panza s’è ‘nturzata e curre pecché ‘a sacca è spertusata e schiatte pecché ‘o tiempo te strascina. Ma ‘a vita nun’è vita senza ‘e chesto! Chesta partita ‘a vence mastu Ddio e si ce stesse ancora nu vulio ricuordete ca ‘o cunto nun dà ‘o riesto. Ma fosse na guagliona o na resata nun te scurda’ ca essa add’à ferni’ e si ‘a passasse senza maje durmi’ mettesse sta mastressa a fa’ ‘a nuttata. ‘Ncoppa a stu munno fatto ‘e farzaria ‘a parte ca tenimmo è tale e quale perciò a te ca liegge stu giurnale datte da fa’ e nun cagna’ maje via.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese