Dialettali 26 aprile 2023 · lettura 1 min · 757 letture

+ Segui

Si ‘a chiocca se facesse manuvella girasse attuorno attuorno a fa’ ‘a fechella e te bussasse a tutte quante ‘e porte cercanno ‘e fa’ cchiù tonne ‘e facce storte. Si ‘a vocca se mettesse a fa’ ‘a duttrina paresse na guagnasta pellerina e te scacasse ‘ncoppa a ogne fronna tutt’e scemenze comme a na gran donna. Si ‘a mana s’accidesse a fa’ ‘a suzzosa spurcasse chesti lastre c’a refosa e t’e ‘nguacchiasse comme fa stu viento ca gira int’a chest’aria a schiattamiento. Si ‘o core se scetasse nu puntillo sbattesse int’a tempesta vrucculillo e te turnasse comme a nu criaturo chiagnenno scunzulato ‘nfaccia ‘o muro. Si ‘o suatto se ‘mparasse a sentenzia’ sparasse tutt’e juorne ‘a verità e te regnesse fraceta chest’aria ca te venesse ‘e botta l’urticaria. Si ‘o sango fosse ammore overamente cusesse cu priezza ‘o munno e ‘a gente e te curasse ‘e vene pe’ campa’ pecché ie senza te nun pozzo sta.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese