Dialettali 12 agosto 2026 · lettura 1 min · 9 letture

+ Segui

‘A vita s’è stracciata comm’a carta ‘mmane a nu dio criaturo ca despettuso m’ha lassato annuro. ‘O cielo all’intrasatta se n’è gghiuto senza da’ n’ombra ‘e aiuto scrivenno ‘ncopp’ ‘e prete d’ ‘a scaienza parole sciacque e ’nzìpete ‘e pacienza. ‘O suonno s’è avutato int’ ’e turmiente ‘ncopp’ a sta terra ‘e stiente ca piglia e scagna core artetecuse lassannele struppiate e assaje piatuse. ‘E notte songo notte sbummecate ca danno sulo lacreme sbrammate. ‘O tiempo perde tiempo appriess’ ‘o sole c’aunito a sta miseria vò fa’ scola p’accuntenta’ ddoie stelle e meza luna ca ‘mpacchiano sta ggente a una a una. Ma tu me guarda ride e parle muto dicenno cu chist’uocchie ca è fernuto e che è arrivata l’ora ‘e se sguiglia’ pecché l’acqua ca scenne addà lava’ sta ‘nziria attarantata ‘nfaccia ‘o muro ca va sbarianno sperza ‘nchiett’ ‘o scuro. E allora nun attenno nu minuto ‘nfaccia a stu cielo sfatto e appecenuto e cerco c’ ‘a fermezza ca n’è morta ‘e chiave ca m’arapeno sta porta.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese