Dialettali 17 dicembre 2014 · lettura 2 min · 3695 letture

+ Segui

Pace a chi mette ‘o sale ‘ncoppa ‘a cora a chi putenno piglia ‘a scurciatora a chi nun caccia manco nu lamiento a chi meza resata è tradimiento... Pace a chi schiumma ‘e notte dint’o scuro a chi stipa schiattato ‘o tiraturo a chi spera ca ‘o sole scanza ‘o lietto a chi stegne na croce sott’o pietto... Pace a chi corre appriesso appriesso ‘o maje a chi venne schiattuso ‘o piglia e daje a chi s’arrogna areto a na nennella a chi ‘nfaccia a nu vaso fa ‘a zetella... Pace a sta terra pace a chesta sciorta pace a stu tiempo a chesta vita storta pace a stu bbene ca bussa e cca nun trase pace a stu suonno ca tene ‘e panne spase ca dà arricietto a chesta chiocca stramma ca smania int’a sta grotta ‘o pate e ‘a mamma e pace a te ca t’accunpagna ‘a croce e cu sta vocca 'e fuoco me faje doce . Pace a chi tene ‘a famma pe’ cumpagna a chi campa facenno ‘o magna magna a chi ce prore ‘o culo e pure ‘a chiocca a chi ca rraggia ‘ncuorpo nun se cocca... Pace a chi pitta ‘o munno vasulato a chi t’mmesca ‘o mele c’o salato a chi vulenno scagna risa e ammore a chi pezzente te riala ‘o core. Pace a chi soffre e a chi sta troppo bbuono a chi carrianno ‘o sole scanza ‘o tuono a chi coglie e a chi sape e a chi nun vò sapé e finalmente amico PACE A TE!

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese