Dialettali 18 ottobre 2023 · lettura 2 min · 607 letture

+ Segui

E canto pe da’ sciato a chesta vita jucanno notte e juorno na partita ca porta sango pene e pecundria ca astregne acqua e viento c’o vurria. E canto pecché ‘a vocca vò sbaria’ cuntenta ‘e nun sape’ cchiù arraggiuna’ cu chistu tiempo favezo e ‘nziriuso cu tanta genta ca me lassa ‘nfuso. Faciteme canta’ faciteme sfuca’... Si ‘a voce è nu strumento ve dice cca che sento... Ve conta na speranza nu brutto male ‘e panza na freva na bevuta na nenna ca è sparuta ma sempe ‘a voce è ‘a mia ca chiagne e da’ alleria. E canto na certezza scanusciuta pazzianno cu sta sciorta maje vestuta ca corre appriesso appriesso e vò sfianca’ ca vene chianu chiano a me ‘nzurdaì. E canto pe sti strate senza case pe st’aria ca m’asciutta ‘e panne spase speranno ‘e fa sguiglia’ chella furtuna ca accatta ‘o sole e ca se venne ‘a luna. Faciteme canta’ faciteme sunna’. Stu core ca è signore ve parla ‘e fuoco e ammore. Se mette a palpetia’ pe pognere e vasa’ duie verze ‘e na canzona quacche serata bbona e pure ‘a voce è ‘a mia e sfronna a fetenzia. E canto c’o curaggio ‘e nu pezzente sotto a stu cielo debbole e cucente ca spenne sorde sciorta e madunnelle ca striscia ‘nterra pe ddoie semmenzelle. E canto pure quanno ‘a notte è nera e tengo ‘a malasciorta pe mugliera pecché io ne so’ certo... piccerè: è chisto ‘o tiempo ca può sta cu me. Faciteme canta’ faciteme sbaria’. Io so’ nu monumento nu granne sciuglimento. Io songo na vessecchia ca ve spalomma ‘a recchia. Io songo na capera ca sfotte ‘o pilo a’ sera. E chesta voce mia è figlia a na pazzia.

♥ 0 💬 0

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese