Dialettali 13 dicembre 2023 · lettura 3 min · 843 letture

+ Segui

‘O diavulo ca ‘a sempe tene ‘e corna e comme ‘ncoccia a l’ommo ‘mpacchia e ‘nforna ‘a coppa ‘a terra turnava na matina cu mille e cchiù fetiente levantine... ‘A sera... era dicembre... e chi s’ ‘o scorda... Sapenno ca nasceva ‘o Bammeniello scennette a Betlemme farfariello vulenno stravisa’ chella nuttata pecché int’e vene vulleva na penzata... Giraie... addimmanaie e se ‘nfurmaie e mente nu chiachiello le diceva ‘o Ninno puntualmente addò nasceva facette ‘o serpentiello natalizio vulenno scatarrarse chillu sfizio. Lassaie ‘a città e chillu sprevetato truvaie ‘a stalla meza squinternata nu sacco ‘e ggente e ‘a stella ’mpertecata... S’annascunnette areto a Baldassarre e chianu chiano jenno appriesso appriesso s’appreperaie a scumbina’ ‘o cungresso. Trasette ainto e te cacciaie ‘o curtiello ma comme se ‘ncuntraie c’ ‘o Bammeniello cu l’uocchie ca parlavano d’ammore. ‘O disgraziato se cagnaie culore e cadenno ‘ncantato ‘nnanze a Dio dicette: “Mio Gesù, ce sto pur’io! Songo fetuso ‘o saccio e malamente ma senza ‘e te nun songo propio niente! Stanotte tu sì nato e me sì rrè e nisciuno cca ’o sape meglio ‘e me. Tu spienze sango ardore e vita eterna ma ‘a casa mia purtroppo enno l’Inferno... Te faccio ’a guerra e ogne male ‘nzerro ma sta nuttata justo stu mumento ie so’ cuntento ‘e ave’ nu fallimento... Perduoneme chist’attimo... pietà... ma doppo ‘o saie ie torno a sbacchettia’!” ‘A stalla s’allummaie po’ sana- sana e Gesù Cristo s‘ ‘o pigliaie pe mano e ‘o rispunnette comme fa sul’isso: “Tu nun te può scurda’ ca sì d’o mio e ‘o male ca me faie è ca ‘o voglio io ma ‘o bbene sazia ‘a famma ‘e chi è diuno e tu senza stu bbene sì nisciuno. ‘O male portarrà na vesta bella ma ‘o bbene ca fa ‘a corte e chesta stella ricorda a tutt’ ‘a genta ‘a bbona sciorta ca è nato ‘o primmo ammore e int’a sta porta ce trase sulamente chi vò ‘a pace ce vene overamente chi è capace ‘e da’ a sta terra ‘a voglia ‘e semmena’ ‘e da’ a sta vita ‘a forza ‘e se sguiglia’ cu tutt’ ‘o sole ca l’abbruscia ‘mpietto cu tanta ‘e smania senza ave’ arricietto... E tu ca sì d’a stessa pasta fatta fermate cca e magne int’a stu piatto.” E mente ca Zefierno se prustava ‘o figlio ‘e Ddio cuntento s’o vasava... Ma chesta è na sturiella nova o antica ca porta ‘a mullechella a na furmica nu fatto ca se conta a chella cena quanno ‘e zampogne sonano ‘a nuvena. ‘A verità ‘a sapimmo è n’ata cosa e p’ ‘o munno nun pare ca è piatosa... Resta sulo ‘a speranza chella sora ca sempe appiccia ‘a luce e maie nun more ca nasce int’a sta stalla puntuale quanno ‘e criature cantano “E’ NATALE!”

♥ 0 💬 1

© Tutti i diritti riservati. L’opera è protetta dalla Legge 22 aprile 1941 n. 633 sul diritto d’autore: è vietata la riproduzione, anche parziale, senza il consenso dell’autore.

Peppe Cassese